تظل كل عام انت الا ول بكلشي
وعلى النجمات يضوي بطلتة هلالك
هلال العيد انت ومن نشوفك حيل
نفرح والكلب يتلوى لوصالك
يامعنى الحلال بشرع نور ونار
مالك حل وسط لو حكم ميزانك
يتعنى العدل يم حضرتك محتار
يتعلم الحق من اصل منهاجك
كل عيد وتظل بين الجفن والعين
وياعين التغض النظر لاوصافك
بساتين الشعر نثرت وردهة اليوم
محتفلة وتكولك عيدك مبارك
علي وياعيد احلى من نشد الايد
ونبوس بكل شغف وبشوك شباجك
ياابو حسين يلشوفة ضريحك عيد
ويهلال اليقين اليشع كلماتك
ياصومي وصلاتي ودعوة الملهوف
وياتربة سجودي البيهة بصماتك
نحبك مو تعود لو طبع غلاب
حبك منعجن بأرواح عشاكك
وي طين الخلق حبك اظن مخلوط
لان حتى الجسد يندفن بترابك
مشينة ابين دنيا ووسوسة شيطان
وتلوح انت شمس تحمينة بشعاعك
ونلكى دروب سودة وتعثر الاجدام
بس نرجع ندور اثر خطواتك
لان دربك عدل والمايتبعة يتيه
ويزلك عالصراط المايدك بابك
المواضيع المتشابهه
العرض العادي
