بسم الله الرحمن الرحيم
اللهم صل على محمد وآل محمد وعجل فرجهم وفرجنا بهم ياكريم.
كل عام وانتم بخير
(( مولد الإمام الحسين ع وأبا الفضل العباس ع والإمام السجاد ع ))
فرحانه الشيعه ومسروره وعدها الليلة أعياد
ميلاد حسين وعباس وميلاد السجاد
تكوين الأطهار*** شعت لينا أنوار
ميلاد حسين وعباس وميلاد السجاد
____
1
ياشهر الأفراح.. يا عطر القداح
بيك الفرحه اتزود.. والمؤمن يرتاح
يا گلبي الفرحان.. انساها الأحزان
أجرك بالمولود.. ترتيل القرآن
افرح هاي الليلة هوايه واطلب كلشي تريد
ميرجعك ربنه شما تدعي وعنده الليلة العيد
ما ترجع محتار*** شعت لينا أنوار
ميلاد حسين وعباس وميلاد السجاد
____
2
بحسين وعباس.. متعطره الأنفاس
وميلاد السجاد.. أجمل واحلى احساس
أسرار التكوين.. تشبه وجه حسين
مخلوق بأنوار.. مامخلوق بطين
مختلفين أصحاب العصمه مومثل الإنسان
واحدهم من تنظر وجها عبالك قرآن
يا روح الجبار*** شعت لينا أنوار
ميلاد حسين وعباس وميلاد السجاد
____
3
مولد راعي الجود.. غِيره وعزه وزود
وهوه مگمط صاح.. لرض الطف موعود
متربي بحضنين.. يم زينب وحسين
وبزغره الكرار.. قبلها الچفين
چفه يشابه چف الوالد من بالحومه يصول
حيدر رد للحومه يقاتل كلمن شافه يگول
يشبه للكرار*** شعت لينا أنوار
ميلاد حسين وعباس وميلاد السجاد
____
4
ميلاد السجاد.. أفراح واعياد
كل خامس شعبان.. نفرح من ينعاد
ونهني المختار.. بسادس اهل الدار
ابن الغالي حسين.. يشبه حامي الجار
آذن يمه حسين وكبّر والساجد سماه
شاله وبحضانه يلوليله وعد زينب خلاه
بالمولود أسرار*** شعت لينا أنوار
ميلاد حسين وعباس وميلاد السجاد
____
الشاعر #مصطفى_الشافعي