((ردينه ردينه))((كَعده))
ردينه // ردينه // يبن أمي ردينه
نار بكلبنه وجمر // ودموع صبّينــه
وين الكلفني ويـــن
وينك يخوي حسين
يبن أمي ردينه
*************
وياي عاشت هل المصايب من أهد ذيج المسيه
والي ماضلّي ويحامي ولابقت خيمـــــــه عليّـه
حين صاب السهم كلبك المثلث جنّه بيّــــــه
طيحت الساقي ابو الفضل
زادت عليّ هذا الحمــــــل
بعد السلب فـــــوك الهزل
خويه أخذوني سبيّه
جتفوا أطفال وحرم// للكوفه ودونه
للشام سار الضعن // تاليها أخذونه
ششكي ينور العين
وينك يخوي حسين
*****************
راسك مفارك الجثّـــــه صار هوَّ الحادي بينه
بالضرب والسب خذونه أتناسوا الله ونسوا دينه
كوم كلهم يعرفونـــــــه مارعوا حرمة نبينـــه
بالشام عيني ماغفت
ياريت صكت وعمت
ولاشفت نظرات الشمت
أنتخي بحادي الضعينه
الكلب ظل ينوح // عالراس من شافه
أبن الدعيّه يزيد // يضربه بشفافـــــه
بوسط الحشه نارين
وينك يخوي حسين
**********
أرد اخبرك بالجرالــــي هموم صدري شيل عنّي
بالنوايب كَظــه عمري زاد لجلك خــوي ونّـــــي
عنّي روحك لمّه غابت أحس روحـــي خذوا منّي
ورباب ردت للمهد
عريس متحنه بعد
والاكبر الليله مرد
تسمعه الونهن ونّي
مهظومه مكسوره // كل وحده من عدهن
أكعد يبو السجاد // عالحــــــال ناشدهن
لالوعه لاثنتين
وينك يخوي حسين
****************
الحزن بينه انواع منَّه أنعبر بونّه وبجينه
وآ حسين النوح يكثر للكبر حضنت أدينه
يانشد تدكر تجاوب يبو اليمه رد علينه
جارت علينه كربله
للجثث عفنه مرمّله
نشّف الدمعه الهامله
نشكي يم راسك سبينه
كل الحراير هاي// وطفال محرومـــه
بسد العليل تنــام // من طحتوا بالخيمه
ردتلك شبعدين
وينك يخوي حسين
*************
العليل بعلتـــــــــه لايج ماتحسّن يوم وضعــه
من رجع من دفن جثتك ماهجع لليـــوم دمعه
أيأشر هنانه دفنتـــــــــه الاكبر وجاسم وربعه
ياحال ألك ماسولفـــــه
بيك أدري أنته تعرفه
عنك المرني ماخفه
أبد مالمتنــــــي وسعه
بعيد الكَبر أنظر // للساقي حادينه
مدفون وحده هناك // بيساره ويمينــه
ياهظمة الجفّيـــــــن
وينك يخوي حسين
**********
هذا آخر يــــوم يمّك هاي ساعة فركـــه مُره
علم أسمك يظل باقي ويبقه ذكرك عالي أمره
الظلم لوطال ليلـــــه أنته انواره وفجــــــــره
نورك أبد ماينطفــي
عنوان كل حر أوّفي
الكلب باجر يشتفــي
يوم ربي الحق يظهره
يعله شعارك دوم // مانقبل الذلّه
هيهات ألف هيهات // للظالم أنكلّه
يوم الفرج تانيــــــن
وينك يخوي حسين
*************
((رجوع السبايا للمدينه)) ((أربعينيه))
***------------------------***
بحماك ياخوي طلعنه // بليّاك بالهم رجعنه
يومك شــلون أنساه
كل لحظه أحيا وياه
***************
من المدينه أسمع شكوتــي للحزن ظل كلبي داره
ردت عزَّت ديـــــــن جدَّك دمَّك الصحح مســاره
صار صدرك مسجد الطف وراسك بوسطه مناره
العلم للعالي أنرفـــــــــــع
صوت الحقيقه من صدع
مابقه واحــــــــــد ماسمع
أنته حق ݘاوين ثاره
والليل ݘلݘل بسواده // واصل بالحزن وداده
واسه حزنـي واساه
كل لحظه أحيا وياه
**-------------**
گلبي ريته أنذبح يمَّك ولانظر عيني بقالـــــي
عمري مايسوه بدونك مو أعز منّك يغالــــــي
وآنه من يومي يوالي روحي أصبّرها وحالي
أنتظر أيام الخطـــــر
وآني بأشد حـال وأمر
مض بيَّه بسهامه الدهر
من وگعت خويه گبالي
أمسه منَّك محرومه // مظلوم وآني مظلومه
والحزن سهمه أمضاه
كل لحظه أحيا وياه
*************
مݘتفينه يساره رحنـــه صرنه فرجه ألهم عجيبه
الخرابه العزنه صارت دارنه بعد المصيبــــــــه
واليتامه والحرايــــــــر تحس كل وحده غريبـــه
أخذونه من درب الدرب
يحسين بالسب والضرب
وتحمّلت كــــل الصعب
الثورتك هذي ضريبه
تدري يانورعيوني // ماگدروا يذلُّوني
بالطف عهدك وفّيناه
كل لحظه أحيا ويــاه
****************
رجعت وحزاني عله متني حاملــــــه هموم الرزيَّه
صُوَر أبطـــــــال وجثثهم عيدهم هاي المنيَّـــــــه
سابحــــــــــه بدم الشهاده نجوم ظلَّت عالوطيــــه
ياخوي ولشوفك أحن
عايشه أبقه بالحــزن
تمنّيت يومي وندفـن
بعد يوم الغاضريه
ردّيت خطواتي دموع // آهات كلبي المفجوع
حالي الصخر بجّاه
كل لحظه أحيا وياه
**-------------***
المواضيع المتشابهه
العرض العادي
